الأنشطة الترفيهية خارج إطار المدرسة عند الآباء الموظفين

غالبًا الآباء لي كايخدموا خارج البيت كايلقاو مشكل في تدبير أمور الحياة اليومية : بين العمل، التسوق، تربية الأبناء، تحضير الطعام و نتظيم البيت والإهتمام بالشريك ديالك؛ كايتزادهم في البرنامج اليومي: الأنشطةالترفيهية خارج إطار المدرسة! هنا إذا ماكانش عندكم سائق خاص لي غادي يتكلف بتوصيل الأطفال للنوادي فانتم كآباء خاصكم تلقاو حيل مدروسة لتنظيم وقتكم. بذرة الحياة جات تساعدكم ببعض الأفكار لحسن تدبير الأنشطة الترفيهية ديال وليداتكم.

تحديد عدد الأنشطة الترفيهية

طبعًا هذا أمر مفروغ منو، فكلما سجلتوا أولادكم فمختلف الأنشطة و الرياضات فجدول استعمال الزمن ديالهم و ديالكم غادي يعمر. فقبل ما نسجل ولدي فأي نشاط، لازم نطرح على نفسي الأسئلة المناسبة. لا ننكر أن ممارسة الرياضة أو القيام ببعض الأنشطة الفنية خارج إطار المدرسة أمر مهم جدًا لوليداتنا، و لكن مانكتروش! نتأكدوا أولًا أن الأنشطة المختارة مرغوب فيهم فعلًا من طرف الطفل و نسجلوه فنشاط واحد أو زوج كايعجبوه، أفضل من 4 أو 5 أنشطة.

نفكر فجميع الجوانب قبل ما نسجل ولدي فأي نشاط!

في الوقت لي نبغي ندير مع ولدي الإختيار ديال الأنشطة الترفيهية ديال السنة، لازم نخطط مزيان و نحط أمامي بعض المعايير لي خاصني ناخد بعين الإعتبار.

• التوقيت:

خاص يناسبني أنا و ولدي معاً. مثلًا حصص الرياضة غالبًا ما كايكونو مرتين وسط الأسبوع و كايساليو حتال الثامنة ليلًا. و هاد الأمر من الأفضل نتفاداوه قدر الإمكان لأننا غادي نزيدو في الإرهاق ديالنا و ديال وليداتنا. ماتنسايش أنه حياتك انت لا تقتصر على الأطفال فقط، أنت أيضًا عندك روتين خاصك تحافظي عليه و تحتارميه.

• الأيام:

إذا الآباء معاً كايخدمو طول اليوم و ماكاينش لي يتكلف بتوصيل الأطفال للنادي مثلًا: فلا داعي لبرمجة ذلك النشاط يوم الأربعاء إلاّ إذا كان النادي قريب و يقدر يمشي على رجليه مرافق بالمربية ديالو.

الآباء كايدخلوا للدار في وقت متأخر في المساء، إذًا وسط الأسبوع لا داعي لبرمجة أي نشاط في آخر اليوم

هنا كايبقاو أيام نهاية الأسبوع لي يمكن ليك تتحركي مع أبنائك بحرية لممارسة الأنشطة ديالهم.

ماتنسايش أن لكل بيت الظروف و المعيقات ديالو، فلا بأس أننا نتأقلموا معها بالشكل لي كايناسبنا

• مكان الأنشطة:

إذا كان المقر ديال الرياضة أو النشاط بعيد بزاف على البيت فمن الأفضل أنك تكوني واقعية شوية و ماتغمضيش عينك على هذه النقطة لأن: يوم كامل في الخدمة+ازدحام+خاصك توصليه في الوقت +  قلق + العودة في وقت متأخر أحيانًا… فهادشي كافي باش يخليك تملّي بسرعة و تتخلاو على داك النشاط قبل نهاية السنة.

اختيار النشاط و التنظيم القبلي له

• تعليق جدول استعمال الزمن في مكان واضح في البيت(باب الثلاجة مثلًا) و هاد الأمر غايعاونك فأنك توجدي لولدك البدلة ديالو في الوقت. لابأس أنك تشاركي الجدول مع الناس كلهم المعنيين بالأمر لتدبير أفضل.
• التنسيق مع جار أو صديق لي كايسكن قريب لكم و أولادكم كايمارسوا نفس الرياضة باش تتعاونوا على توصيلهم. مثلًا كل واحد يتكلف بالتوصيل أسبوع أو واحد يوصلهم والآخر يجيبهم، فكايبقى الأمر ليكم.

إذا الظروف ديالكم ما سمحاتش لكم نهائيًا باش تسجلوا الطفل فأي نشاط فلا عيب في ذلك و لا حرج عليكم، يكفي أنكم تشرحوا لطفلكم أن هاد المرة حاولنا فعلًا نلقاو حل و لكن للأسف مايمكنش. حاولوا تشوفوا واش المدرسة كاتقترح بعض الأنشطة مثلًا وسط الأسبوع أو أجلوا كلشي لعطلة نهاية الأسبوع. و استافدوا منها للقيام بخرجات ترفيهية مع وليداتكم.