الحمل المتعدد: شنو خاصك تعرفي على التوأم
لقيتي راسك حاملة و هذا أسعد نهار فحياتك، لكن حامل بطفلين! غادي تعيشي التجربة ديال الحمل المتعدد، انت و زوجك في فرحة لا توصف و لكن كاتطرحي على نفسك هاد السؤال: كيفاش حتى وقع فيا هادشي؟ كاتستغربي لأنه ربما شي واحد من عائلتكم ولد توأم قبلكم، فكيفاش حتى حنا غادي نعيشو نفس التجربة؟
بذرة الحياة جات توضح ليك الصورة أكثر و غادي تشرح ليك أولآ شنو هو الحمل بالتوأم و أسباب حدوثها.
الحمل بالتوأم : شنو المقصود هنا ؟
الحمل بالتوأم هو بكل بساطة تكون جنينين في الرحم ديال الأم، نذكر نوعين من هذا الحمل:
- التوأم المتشابه: هنا الإخصاب كايكون حدث في بويضة واحدة بحيوان منوي واحد غير أن ديك البيضة تقسمات على زوج. هاد الإنقسام ممكن يحدث حتال 15 يوم بعد الإخصاب. التوأم المتشابه كايكون عنده نفس الخصائص الجينية و لي كايجعل الجنينين كايتشابهو في الجنس و الصورة.
- التوأم المختلف: هنا الأمر مختلف فعلًا بحيث أن الإخصاب يحدث على مستوى بويضتين بواسطة حيوانين منويين و لي كايعطينا بيضتان. التوأم المختلف ما عندهمش نفس الخصائص الجينية و غادي يعطيو جنينين مختلفين من حيث الصورة لا محالة و ربما من حيث الجنس أيضًا.
علاش حنا بالضبط ؟
الحمل بالتوأم أمر مألوف جدًا بالرغم من أنه كان قليل في السنين الماضية. فالآونة الأخيرة هاد الظاهرة العجيبة عرفت تزايد كبير بحيث أن التوأم المختلف أكثر حدوثًا من التوأم المتشابه.
الحمل بالتوأم وراءه 3 أسباب رئيسية:
- الوراثة: يعني إذا العائلة ديالكم فيها توأم فكاين احتمال أنه حتى أنت تولد توأم
- عمر الأم: كلما زاد عمر الأم كلما الحظوظ باش تحرر أكثر من بويضة في الشهر كايتزاد أيضًا. في هذه الفترة كايكون عندها إفراز هرمون التحوصل عالي.
- التوجه نحو الحلول الطبية للحمل بحكم مشاكل الخصوبة لي ولينا كانشوفو عند الشباب في هاد الوقت (التلقيح الإصطناعي و التخصيب في المختبر). عدد الحمل بالتوأم (المختلف خاصة) عرف تكاثر كبير مؤخرا، لأن هاد الحلول الطبية ترتكز على زرع عدد كبير من البويضات في آن واحد باش احتمال النجاح يكون كبير. و ليكن في علمكم أن هاد الحلول هي السبب وراء تزايد عدد التوأم في العالم في السنين الأخيرة.
من الطبيعي الحمل بالتوأم يكون كايستدعي تتبع خاص و تنظيم خاص، باش تعرفوا كيفاش تعاملوا معه، زوروا المقال الآتي.