الرضاعة و الصيام
خلال شهر رمضان، المرأة المرضعة معفية من الصيام و مامطلوبش منها. العلماء بالإجماع كايقولو أن المرأة المرضعة عندها رخصة باش تفطر حتى تسالي مدة الرضاعة و تعوض الأيام لي فطرات فيهم في وقت لاحق.
قرار عدم الصوم كاتكون على حساب سن طفلك. رضيع ديال ست شهور كايتغذا أساسًا من حليب الأم و على طول اليوم، ماشي بحال طفل العمر ديالو عام أو أكثر لي كايتغذا بأطعمة أخرين و يكمل فقط بحليب الأم.
حاولوا تسولوا الناس لي في المحيط ديالكم و سبقوكم فهاد التجربة، باش يشاركوا معكم رأيهم و كيفاش تعاملوا مع الصيام وقت الرضاعة. و ماتترددوش في الإستشارة مع الطبيب ديالكم أو الأخصائيين في الرضاعة الطبيعية أيضًا غادي يفيدوكم بزاف.
واش الصوم في فترة الرضاعة ممكن يأثر سلبًا على الطفل ديالي؟
إذا قررتي تصومي، فالطفل ديالك ما غادي يكون عليه حتى شي تأثير حيت الجسم ديالك غادي يبقى يخدم بالشكل ديالو الطبيعي و ينتج الحليب بحال الأيام الأخرى.
الإمتناع عن الأكل و الشرب من الفجر حتى للمغرب ممكن يقلل من الطاقة و الحيوية ديالك فقط، ما غاديش يكون عندو تأثير على كمية الحليب لي كاينتجها الجسم ديالك يوميًا.
خاصك تعرفي سيدتي أنه بمجرد ما الجسم ديالك كايحرق السعرات الحرارية لي خداها من آخر وجبة كليتي، فكايتأقلم مباشرة مع الوضعية لي هو فيها، و كايستمد الطاقة ديالو من خزائن أخرى. هنا الجسم دسالك كايحرق أولًا السعرات الحرارية لي كاينين في خزان السكر لي فالدم و من بعد كايحوّل الدهون لي عندك لسكر في الدم. و هادشي قادر يخليك واقفة و عايشة عادي حتى يوصل وقت الإفطار.
الصيام في فترة الرضاعة ممكن يدير تغيرات خفيفة في المكونات ديال الحليب لي كاينتج الجسم ديالك بحيث أن مستويات بعض الفيتامينات في الحليب ممكن تتغير.
بعض الدراسات بينات أن مستوى الزنك و المانيزيوم و البوتاسيوم كاينقص في حليب الأم لي كاتصوم في فترة الرضاعة. الجسم ديال المرأة هنا كايعتامد بزاف على مخزون الطاقة حتى يكملو بدون ما يتأثر الحليب ديالك و غادي يستمر طفلك في التغذية و النمو و لو ينقصو مستويات المكونات الغذائية خلال ساعات الصيام.
واش التغيرات في الحليب ديالي ممكن يأثرو على طفلي؟
احتمال جد ضعيف باش أن طفلك يتأثر. مبدئيًا غادي يكون متعود على التغييرات في الحليب بحكم تغير التغذية ديالك و شخال من مرة كايطلب يرضع. لا داعي للقلق، لأنه غادي يستمر في النمو بشكل عادي و طبيعي ما دام كاتعطيه يرضع كلما طلب.
عادي جدًا أن نوع الدهون كايتغير من سيدة لسيدة و حتى عند نفس السيدة مع تقدم السن. الجسم ديالك غادي يستعمل الدهون لي مخزنها باش ينتج الحليب الكافي في حالة ما إذا التغذية ديالك كانت ناقصة.
واش الصوم خلال الرضاعة ممكن يأثر على الصحة ديالي؟
عادة الجسم قادر يتحمل الصوم، غير أنه إذا كانو ساعات الصوم طوال بزاف فكاين احتمال ديال الإصابة بنقص السكر في الدم. في هذه الحالة، إذا بديتي كاتحسي بأن الصوم كايأثر على صحتك و جسمك، فلازم تحبسي الصوم من أجل المصلحة ديالك.
كانعرفو جميع أن الصوم ممكن يحسسك بالجوع و حتى بالعطش. و جفاف الجسم من الماء كايأثر سلبًا على الصحة ديالك. هادو بعض الإشارات لي غادي يخليوك تعرفي أن جسمك يعاني من الجفاف:
- إذا حسيتي بالعطش
- التبول مرات قليلة و لون البول أصفر مغلوق
- الشعور بالدوخة و الدوار
- الخمول و الكسل
إذا بديتي ماتحسي بإحدى هاد العلامات فخاصك توقفي صيامك بشرب الماء و من الأفضل زيدي للماء طريف ديال السكر أو شربي شي مشروب طاقي. و طبعًا رتاحي مزيان! و إذا مرت نصف ساعة و لقيتي راسك مازال كاتحسي بنفس الأعراض، خاصك تستاشري مباشرة مع الطبيب ديالك.
كيفاش نخلي الصيام مايأثرش عليا في رمضان ؟
الإستعداد القبلي للصيام غادي يساعدك بشكل كبير باش تبقاي محافظة على سلامتك الصحية، إليك بعض الإقتراحات:
- نقوم بالأشغال لي كاتكلفني جهد قبل من وقت الصيام
- نلتازم بجدول غذائي في الليل لي غادي يعاوني باش ناخد الأغذية و المشروبات لي غادي تكفيني للنهار ديال الصيام. ممكن تستاعنو بالتطبيقات المتوفرة حاليا في الأنترنيت لأنها فعلًا كاتساعد بزاف.
- بقاي فمكان الحرارة ديالو معتدلة و ارتاحي قدر الإمكان
- سمعي مزيان للجسم ديالك و سولي الطبيب ديالك في حالة ما حسيتي بأي عرض
- حاولي تشربي بزاف الماء و كولي وجبات متاكملة و متوازنة. و طبعًا ماتنسايش وجبة السحور و حاولي ديري منبه يفيقك باش تاكلي و تشربي قبل الفجر.
- يمكن ليك تعاوني جسمك بالفيتامينات المكملة
- مع الرضاعة كايكون صعيب عليك أنك تاكلي بشكل كافي في الليل، فانتظري أنك غادي تنقصي الوزن شوية خلال شهر رمضان. يعني غادي تقدري تنقصي واحد نصف كيلو أو كيلو كل أسبوع و هذا أمر عادي. و إذا شفتي راسك كاتضعافي بشكل سريع و ملحوظ فهنا خاصك ضروري تستاشري مع الطبيب ديالك.
في أي وقت خاصني نطلب الإستشارة أو المساعدة؟
إذا مرضتي أو كاتحسي براسك فاشلة و كاتعاني من جفاف الجسم، ضروري هنا تشرفي الطبيب ديالك.
إذا شكيتي أن الصوم كايأثر على الحليب ديالك و التغذية ديال طفلك، فممكن تسولي الطبيب ديالك أو الأخصائيين في الرضاعة الطبيعية.
العلامات لي كاتدل على أن الحليب ديالك نقص:
- وليتي كاتغيري ليه الحفاظات مرات قليلة في اليوم ( عادة رضيع كايرضع حليب الأم كايستعمل على الأقل ست حفاظات في اليوم ابتداء من الأسبوع الأول من عمره. و إذا مان حتى عو كايعاني من الجفاف فالبول ديالو غادي يكون أصفر داكن)
- كاتعطيه يرضع و مع ذلك كايبقى غير راضي و كايبكي و كايطلب يرضع أكثر.
- اليدين و الرجلين ديال طفلك كايكونو باردين و عليهم بقع
- الوزن ديالو ثابت أو كاينقص
- دائمًا متوتر