حفاظات قابلة للغسيل و إعادة الإستعمال: فكرة جيدة أم العكس؟

اختياركم للحفاظات كايكون فيه اعتبار لميزانيتكم، للبيئة لي كاتعيشو فيها و خاصة لبشرة الطفل ديالكم. هادو هما الأسباب الرئيسية لي كايخليوكم تفكرو في الحفاظات المتعددة الإستعمال، و لكن واش هاذي فكرة مزيانة أو العكس؟

علاش نختارو الحفاظات القابلة لإعادة الإستعمال؟

تكلفة أقل:

الحفاظات أحادية الإستعمال لي أغلبيتنا كاتشري كايتقامو بميزانية لا بأس بها خلال المدة لي غايلبسها الطفل ديالنا. اذا اعتبرنا الثمن المتوسط ديال الحفاظة هو 2 دراهم (طبعًا حسب النوعية و الشركة المنتجة فالثمن كايتراوح بين 1,2 درهم إلى 3 دراهم) و أن الطفل غايستعمل تقريبا 6000 حفاظة (بمعدل 7 حتال 8 حفاظات في الأشهر الأولى و هاد العدد كايبقى غادي و كاينقص كلما كبر الطفل)، فهاد الحساب غايعطينا ميزانية إجمالية ديال 12.000 درهم لي طبعًا ممكن يكون أكثر أو أقل على حساب نوعية الحفاظة.

الحفاظ على البيئة:

حفاظة أحادية الإستعمال غادي تبقى فوق سطح الأرض و بالضبط في مطارح النفايات لمدة 500 سنة تتحلل و كاتطلق غازات سامة في الجو، عكس الحفاظات المتعددة الإستعمال لي يمكن تستافدي منها لسنوات و لأكثر من طفل.

حماية بشرة طفلك:

غياب المواد الكيماوية كايعني غياب الحساسيات و الإلتهابات (بعض الأطفال كايكون عندهم حساسية لبعض المواد بحال البلاستيك مثلًا) إلاّ إذا لجأتوا للحفاظات مصنوعة بمواد 100% طبيعية غير أن ثمنها كايكون شوية طالع.

شنو خاصك تعرفي قبل خوض هذه التجربة:

لاشيء كايمنعك من تجريب الحفاظات المتعددة الإستعمال، غير خاصك تعرفي بعض الأمور أولًا.

الإستثمار و التحضير القبلي:

خاصك ديري الحساب ديالك باش توفري عدد لابأس به من الحفاظات و يكونو بأحجام مختلفة (إلاّ إذا شريتي الحفاظات التي تتمدد و تليق بأحجام مختلفة).
خاصك تشري بعض المعدات لي كاترافق الحفاظات القابلة لإعادة الإستعمال كمسحوق الغسيل مثلًا و الأكياس العازلة لي كاتمكنك من تنظيفها في الغسالة بشكل سليم.

وفرة المواد و المعدات:

تأكدي أن الأمور لي غادي تخصك و تخص نظافة طفلك متوفرة بالقرب منك و لا حاجة لاستيرادها من البلدان الأخرى. اليوم في المغرب أصبح كلشي متوفر تقريبًا في الصيدليات و خاصة في المواقع التجارية الإلكترونية. ولينا كانلقاو منافسة كبيرة بين العديد من الماركات و لي كايعطينا حنا كمستهلكين وفرة كبيرة في المنتوجات، و هادشي ماكانش متوفر بهاد الشكل في السنوات القليلة الماضية و جعل الناس مجبورين على اختيار الحفاظات الأحادية الإستعمال.

التنظيم القبلي:

هاد الحفاظات يجبرونك على تبني واحد الروتين ديال النظافة و الغسيل ديالهم بانتظام. خاصك حفاظات نقية للاستعمال بوفرة بينما الأخرين كايتغسلو، و منين يتغسلو فوقت الصيف غادي ينشفوا بسرعة، لكن في أيام الخريف و الشتاء التجفيف ديالهم غادي ياخد وقت أطول، يعني لازم تنظمي راسك مزيان لتفادي أي مشكل.

وقت غيابك :

اذا كان شي شخص هو لي غادي يهتم بطفلك وقت غيابك كالمساعدة في البيت مثلا، واش غادي تنجح في تتبع طريقتك؟ واش قابلة أنها تطبق حرفيًا التعليمات لي غادي تعطيها؟ و واش الحضانة تقبل التعامل بهاد النوع من الحفاظات مع الأطفال؟

بعد قرائتك لهذا المقال، مزال متحمسة لخوض التجربة ؟