حفلات الأعراس برفقة الأطفال: فكرة جيدة أم لا ؟
موسم الأعراس على الأبواب و العزومات ولات كاتعرض عليك بكثرة و طبعًا أنت لا تضيعين فرصة النشاط. غير هو الآن مابقيتيش ديال راسك و وليتي مسؤولة على طفل لي ممكن يشكل ليك عائق لحضور الحفلات. هنا كاتبقاي تسألي راسك: واش نخليه مع شخص آخر يقابلو؟ و إذا ما كان حتى واحد لي يتكلف بيه؟ نديه معايا؟ أجي نشوفو واش الفكرة صائبة أم لا.
حضور حفلات الأعراس برفقة الأطفال : شنو كايتسناك.
قبل ما نهضرو على واش فكرة اصطحاب الطفل للعرس صائبة أم لا، أجي نشوفو شنو كاينتاظرك عند وصولك:
- الضجيج: و لي هو أمر يؤخد كثيرًا بعين الإعتبار مني كايكون عندنا طفل باقي صغير. العرس كايعني مباشرة موسيقى و غناء بأصوات عالية من الدقة المراكشية للجوق للمغني.. طفلك شبه مستحيل يستمتع بيهم. علو الأصوات و الموسيقى كايفوت القدرة السمعية ديال طفل صغير و لي ممكن تأثر عليه سلبًا على المدى البعيد. تخيلي معانا القلق لي غادي يخلق ليك طفلك وسط هاديك الأجواء.
- الإكتضاض و اختلاط الناس: أعراسنا في غالب الأحيان كاتعرف حضور عدد كبير من الناس. و فاش كانتكلمو على كثرة الناس كانفكرو مباشرة في خطورة انتقال الأمراض و الفيروسات خاصة إذا كان الرضيع صغير في السن و المناعة ديالو غير مكتسبة كليًا و مازال ما كملش الحقن الكاملة ديال اللقاحات اللازمة. هنا، كوني أكيدة أنك غادي تعرضي طفلك لخطر الإصابة بالأمراض.
- تشويش على النظام البيولوجي للطفل: حيت كيفما كاتعرفي أعراسنا كاتبدا في وقت متأخر من الليل و كايساليو حتال الصباح، ربما انت تقدري تبقاي فايقة طوال الليل و لكن الطفل غير قادر على ذلك إلاّ إذا كان كاينعس مهما كان الجو لي ضاير بيه و هادي حالة ربما قليلة. خاصكي تعرفي سيدتي أنه داك العرس ممكن يتحول عندك لكابوس مع طفل كايبكي و يغوت بدون انقطاع.
في حالة ما إذا قررتي أنك تديه معك لحضور العرس:
القرار خديتيه مجبرة أم مخيرة، غادي يمشي معك طفلك، إليك بعض النصائح:
- خدي معك جميع اللوازم لي ممكن تحتاجيها أي حقيبة التغيير لي كاتوفر على كلشي: حفاظات، بدلات و ملابس للتغير، رضاعات، لعاب صغيرة…
- سيري بكري باش ترجعي بكري إذا كان ممكن
- جلسي في مكان بعيد قدر الإمكان على مصادر الصوت
- خودي معك السماعات العازلة للصوت الخاصة بالأطفال إذا كانت متوفرة بالقرب منك أو طلبيها بشكل مسبق من الأنترنيت فأكيد غادي تلقايها.
من الأفضل في مثل هذه المناسبات نكلفو شي شخص آخر بالإهتمام بالطفل وقت غيابنا إذا كان ممكن. غادي يكون أحسن ليكم كآباء تحضرو فراحتكم للحفل و تستمتعو بيه، و هو كذلك يبقى في جو مريح بعيد عن كل ما يقلقه.