الدراسة في البيت : كيفاش و منين نبدا ؟
التمدرس في البيت و خارج جدران المدرسة ماشي أمر سهل أبدًا، و لكن بما أنكم قلبتو و سولتو و تشاورتو و صافي قررتو أنها الطريقة لي كاتناسبكم. فهنيئا لكم و استمتعوا بهذه التجربة الجديدة.
التمدرس بالبيت : كيفاش نبدأ ؟
إذا كان السن ديال الإبن ديالكم ضمن الأعمار لي التمدرس أو ولوج مؤسسة تعليمية ماشي إجباري عليها في المغرب (قبل 6 سنوات و بعد 15سنة)، فلبدأ هذه العملية التعليمية يمكن لك :
- الإتصال بمنظمة خاصة لي كاتماشى مع برنامجك التعليمي لي بغيتي الطفل ديالك يتبع. حاولوا أنكم تبحثو مزيان على أهل الإختصاص فراهم غادي ينفعوكم بشكل كبير و يعطيوكم مستندات باشتخدمو.
- تجتاهد شخصياً في تنظيم الدروس لي بغيتي. و كاتقريهم لولدك بالمساعدة ديال ما وجدته من مستندات في الكتب و الأنترنيت. فهنا انتَ أو أنتِ كأحد الأبوين، غادي تولي كاتلعب دور المدرس أو المعلمو هادشي كايستدعي التزام تام من طرفك و لا حق لك في الخطأ.
- تكلف معلم متمكن إذا قدرتو، يعني في هذه الحالة الأستاذ هو لي كايجي للدار عند الطفل باش يقريه.
استعداد قبلي و تنظيم محكم هم سر نجاح التمدرس في البيت
إذا كان التمدرس في البيت كتيسمح لينا بواحد النوع من الحرية و المرونة في التعلم، فراه كايستدعي استعداد قبلي و تنظيم. فلإنطلاقة جيدة عليك أن :
- تخطط مسبقًا لبرنامج اليوم، التخطيط ماعمرو يكون في نفس اليوم. إذا حطيتي انت كأب واحد النظام و جدول زمني فخاصكم تحتارموهم باش تكملو المقرر لي حطيتو أمامكم في أول السنة.
- توفر الأدوات اللازمة يعني تشري الكتب الدفاتر الأقلام و المستلزمات كاملين.
- تحدد في البيت مكان خاص للدراسة باش الطفل يبقى كايميز بين الحياة اليومية ديالو لي فيها اللعب و بين التعلم و يبقى عاطيه أهمية. ممنوع نقراو و حنا متكيين فالناموسية، كانساليو كانجمعو الكتب ليقرينا فيهم و كانرتبو المكان استعدادا للغد و كانفرقو بين الأدوات على حسب المستوى إذا كان عندنا أكثر من طفل واحد كانقريوه …
المشاركة في الحياة الإجتماعية
عدم ذهاب الطفل للمدرسة يقدر يلعب ضدو في بعض الحالات، يعني لازم عليك انت كوالد أنك تخلق ليه أجواء كالتقي فيها بأقرانو يهضر و يلعب معاهم. و هادي غادي تكون دعوة ليك باش أنك تقلب على آباءآخرين اختارو نفس طريقة التمدرس ديالك.
- انظم لمجموعات آباء اختارو حتى هما التدريس في البيت، أكيد غادي تلقاو بعضياتكم فمواقع التواصل الإجتماعي و ربما تكونو ساكنين في نفس المدينة
- نظموا لقاءات و خرجات مع بعضكم باش تصاحبو أولادكم لزيارة بعض الأماكن لي لازم يتعرفو عليها كالمآثر التاريخية لي في المدينة، المتاحف و حتى المنتزهات فين يلعبو مع بعضهم.
- نظموا حصص جماعية للأطفال فين يقدرو يتبادلو التجارب و يعاونو بعضهم إن اقتضى الحال
- سجلوا أولادكم في نوادي الأنشطة الترفيهية و الرياضية و من الأفضل تكون أنشطة كاتمارس بشكل جماعي.