الدخول المدرسي: تقليل تكلفة المشتريات
الدخول المدرسي قرب و متحمسين أن وليداتكم يرجعو للمدرسة لأنهم جاهم شوية الملل بعد شهرين من العطلة. و لكن الدخول المدرسي يصاحبه دائمًا شراء الأدوات المدرسية من جديد استعدادًا للعام الجديد. هذه الفترة كايكون فيها المخسورات كبيرة و المشتريات كثيرة، بذرة الحياة جابت لكم حيل من أجل خفض تكلفة الدخول المدرسي.
إعادة الإستعمال و التدوير
أول حاجة يمكن تخفف عليك التكلفة هي إعادة استعمال وتدوير الأدوات المستعملة.
- اللوازم المدرسية الكبيرة: كالمحافظ و المقلمات. حاولوعأنكم تشريوهم ذات جودة عالية النهار اللول و طلبوا من الطفل ديالكم أنه يحافظ عليها باش يعاود يستعملها. و تفاداو ما أمكن اللوازم المزينة بالشخصيات الكرتونية لي كاتعجبهوم فديك الوقيتة لأنهم غالبًا ما ميولاتهم كاتغير و يقدر ما يبغيش يستعملها العام الموالي. اختاروا دائمًا الألوان الهادئة و من الأفضل تكون داكنة.
- أدوات قابلة لإعادة الإستخدام: حاملات الوثائق و الأوراق، الأقلام و المقصات و المسطرات و الممحاة، كلها قابلة أنها تستعمل مرة أخرى يكفي أنها تكون باقة مزيانة. شريو وحدين جداد فالوقت ليهاد الأدوات مايبقاوش صالحين فمرة.
- الدفاتر و الأوراق: إذا كان الدفتر باقين فيه عدد مهم من الأوراق الصالحة فيمكن يتستعمل للوسخ مثلًا، أما بالنسبة للأوراق المزدوجة و غيرها فاحتافظوا بها أيضًا للسنوات القادمة.
- اللوازم الغير مدرسية: علبة الغذاء أو اللمجة، قنينة الماء، حذاء و بذلة الرياضة مثلًا يمكن تعاودوا تستعملوهوم. و لكن إذا كان شراء هاد الأمور من جديد مهم بالنسبة لأطفالكم و لذكرياتكم معاهم فلابأس أنكم تدلعوهم ببعض الأشياء الجديدة. و ماتنساوش أن وجودكم فجانبهم يوم الدخول المدرسي و تفرحوا معاهم هو أكثر حاجة كايعقلوا عليها.
هاد عملية إعادة الإستعمال ماشي غير تفرضوها على ولادكم، و لكن شرحوا لهم علاش باش يديروها و هما راضيين: مثلًا حفاظًا على البيئة، اقتصادًا على الميزانية، و للإحساس بالمسؤولية اتجاه أشيائهم. و حس المسؤلية غادي يكبر معاهم و يجعل منهم أناس مسؤولين اتجاه نفسهم و محيطهم.
شراء المستعمل :
أكثر حاجة غالية فلائحة الأدوات المدرسية هي كتب المقررات و كلما كبر الطفل كلما ثمنهم كايزيد يكبر.
- تعرفوا على أب شي طفل سابق ولدكم بعام: عادة ما المقرر ما كايتبدلش من سنة لأخرى فهادي فرصة أنكم تشريو كتاب مستعمل من طرف شي طفل آخر. و شجعوا أولادكم أنهم يحافظوا بدورهم على الكتب ديالهم باش تعاودوا تبيعوها كذلك في العام الموالي. هكذا غادي يسهال عليكم إيجاد المقررات الخاصة بأطفالكم عند الإستعداد للعام الموالي.
- سوق الكتب: و غالبًا كاينظموهم بعض المدارس بالمشاركة مع بعض الجمعيات باش الآباء يجيو مع وليداتهم لبيع و شراء الكتب المستعملة.
- المجموعات و الصفحات على مواقع التواصل الإجتماعي: يمكن تلقاو مجموعات خاصة ببيع الكتب المستعملة لي يمكن تنخارطوا معاهم و تعم الفائدة.
- باعة الكتب المستعملة: كايكونو فكل مدينة غير حاولوا تقلبوا عليهم، البعض منهم كايكون مختص غير بالمقررات المدرسية.
هنا أيضًا خاص شراء المقررات المدرسية المستعملة مايكونش كايضايق طفلكم، حاولوا تشرحوا ليه علاش باش يديرها عن رضًا. و اتصلوا أيضًا بالمسؤولين بمدارس أبنائكم و طلبوا منهم أنهم يحافظوا على نفس المقرر باش يقدروا الآباء يستافدوا من هذه التبادلات و التخفيضات.
بالنسبة للكتب لي الطفل كايكون ملزم أنه يكتب فيها و يجاوب على التمارين فيها، فمن الطبيعي أنها لن تستعمل ثانية إلاّ إذا شراها شي واحد و لم يستعملها.
كذلك و مثال بالنسبة للأدوات الأخرى كالمنجد مثلًا أو الآلة الحاسبة فحاولوا تشريوهم مستعملين، لابأس في ذلك.
شراء اللوازم المدرسية من منصات في الأنترنيت:
منصات بيع الكتب عرفات نجاح كبير بالمغرب و عددهم غادي و كايكبر، كايعرضو عدد كبير من اللوازم و الأدوات مدرسية و غير مدرسية. مزايا الإقتناء من الأنترنيت:
- الأثمنة مناسبة: البيع فالأنترنيت كايجعل السلع تكون رخيصة شوية و تُعرض بثمن أقل في غالب الأحيان.
- مقارنة الأثمنة: يمكن ليك تقارن ثمن المنتوج من دارك بلا ما تنتاقل حتال المكاتب أو المحلات، باش في الأخير تختار المنتوج المناسب ليك.
- سهولة تسليم المشتريات: لاداعي للتنقل أو الإزدحام في المحلات، يمكن توصلكم الطلبية ديالكم حتال المنزل أو يوجدوها لكم مسبقًا و تمشيو المحل تاخدوها بسرعة و بسهولة.
استفيدوا من التخفيضات الخاصة بالدخول المدرسي:
سواءً فالمحلات التجارية الصغرى أو الأسواق الكبرى أو المكاتب فدائمًا كايكونو الهميزات و التخفيضات. حاولوا غير تسناو الفترة لي كايبدا فيها تسويق الأدوات المدرسية (نهاية شهر يوليوز أو بداية شهر غشت).
ما ترددوش أنكم تسولو على بطائق الإنخراط في المحلات التجارية لي كاتهديكم مرة مرة هدايا عبارة عن تخفيضات أو مزايا عند الشراء.
الشراء الجماعي للأدوات المدرسية:
جمعيات الآباء في بعض المدارس كاتجمعوا و كايتافقوا على شراء جماعي من عند بائع بالجملة، الشيء لي كاينقص عليهم التكلفة بشكل كبير. حاولوا واش هذه العملية ممكنة فمدارس أبنائكم.
فترة الدخول المدرسي عادة ما كاتكون قاصحة عليكم انتم كآباء ماديًا فمترددوش أنكم تقومو بهاد الحيل لي عطيناكم باش تخففوا عليكم الفاتورة. و ماتنساوش أنكم تشرحوا لوليداتكم هاد الأمور باش يحسوا أكثر بالمسؤولية اتجاه هادشي لي كاتوفروا ليهم و يحافظوا عليه و راه ماشي ضروري يكونو حاضرين معكم وقت الشراء، وجودهم يقدر يكبر الفاتورة بسرعة.