الحضانة في البيت أو في روض الأطفال
قابلتي طفلك لمدة أسابيع، رضعتي بدلتي هزيتي نعستي و ربما أيضًا خرجتيه يتسارا. و لكن مع الأسف دوام الحال من المحال سيدتي. شهور الإجازة لي خديتي من أجل الولادة و الراحة تسالاو، و جا الوقت ليخاصك ترجعي فيه للخدمة و لكن هاد المرة خاصك تلقاي لي يقابل الرضيع ديالك فبلاصتك، واش غادي تختاري الحضانة لخاصة بالأطفال أو غادي تجيبي ليه مساعدة في البيت لي تهتم بيه.
هنا الآراء غادي يكترو عليك و كل واحد غادي ينصحك حسب التجربة ديالو، ديه للروض فهو أفضل ليه، جيبي مربية أحسن، و وحدين آخرين غايقولو ليك من الأفضل أن وحدة من الجدات ديالو تجي تقابلو إلاممكن … و لكن طبعًا القرار الأخير كايبقا ليك و ديالك، و لكن بذرة الحياة جات تنبهك لبعض النقط لي خاصك تردي لهم البال.
الحضانة في البيت
دادا هو عادة الإسم باش كانعيطو لديك السيدة لي كاتجي عندنا كل نهار للدار باش تهتم و تقابل الوليدات فبلاصتهم، فمحيطهم بلا ما يحتاجو يفيقو بكري في الصباح أو يخرجو من ديورهم. الهم الوحيد هنا هو تلقى الشخص المناسب!
شخص تقتارح عليكوم من طرف ناس كاتعرفوهم مزيان، غادي يكون أفضل. و في كل حال بحثو مزيان و سولو عليه الناس لي فايت خدم عندهم في تربية و رعاية أطفالهم.
اتافقو مزيان على الأوقات، و أكدوا على احترام المواعد. المربية لازم تفهم أنك عندك خدمة في انتظارك و خاصك تكوني انت أيضًا في الوقت و ماتأخريش عليها. و احترام الوقت يجري طبعًا عليكم كآباء تابعاكم خدمة خارج البيت و على المربية أيضًا لي عندها عائلة كاتسناها و فآخر النهار خاصها ترجع لدارها.
حطو النقط على الحروف و حددوا المهام من الأول باش هاد المساعدة تعرف ما عليها: رعاية طفل واحد أو أكثر، تنظيف، طبخ، غسيل، لعب أو القيام بخرجات. تأكدوا أنها قادرة تقوم بداكشي لي طلبتوه منها فيإطار المعقول طبعًا.
الحضانة في روض خاص بالأطفال
إذا الحضانة في البيت ما قنعاتكومش بزاف أو ببساطة ما ارتاحيتوش لأنكم تخليو طفلكم لإنسان غريب، فروض الأطفال حتى هو حل مزيان.
قلبوا بشكل مسبق على المؤسسة للتسجيل، عادة الأماكن كاتكون جد محدودة.
ديرو دراسة للقدرة المادية ديالكم، لأن هاد الخدمات حاليًا ولات مكلفة.
سولوا على تجارب أقاربكم مع رياض الأطفال لاختيار الأفضل، و بحثوا أيضًا فمواقع التواصل الإجتماعي على آراء الناس بخصوص المؤسسات لي جربو.
زوروا كل روض ختاريتوه، مرات متكررة إن اقتضى الحال و تحاوروا مع المسؤولين فيه، طرحوا عليهم أسئلتكم باش يطمأن بالكم على أطفالكم.
مهما كان القرار ديالكم بخصوص هاد الموضوع، فيمكن ليكوم تبدلو رأيكم وقتما بغيتو إلا ماكنتوش راضيين على النتيجة. في بعض الحالات خاص نجربو بزاف ديال طرق الحضانة باش يالاه نلقاو وحدة كاتناسبنا.