تكيس المبيض هو أمر خالق شوية ديال الرعب عند بعض السيدات. بذرة الحياة جات توضح لكم الصورة و تعطيكم المعلومات المهمة لي لازم كل سيدة تعرفها.
شنو هو تكيس المبيض؟
تكيس المبيض ماشي مرض بل هو فقط متلازمة. عكس المتلازمات الأخرى، فهاد الأخير منتشر و معروف لأنه كايقيس عدد كبير من النساء لي نسبة ديالهم في المغرب كاتوصل حتال 15 إلى 20%.
تتمظهر عند المرأة بتشكل العديد من الأكياس بسبب انتاج غير عادي ديال الأندروجينات و كتشوش على عملية الإباضة و بالتالي كاتأثر على خصوبة المرأة.
شنو هما أعراض تكيس المبيض؟
الأعراض كايختالفوا من مرأة لأخرى، و لكن لي معروفين و مشتركين عند معظم النساء:
- اضطراب في الهرمونات: غياب أو عدم انتظام الدورة الشهرية
- اضطرابات في الجلد: ظهور الشعر الزائد في الوجه و العنق، حب الشباب أوتساقط الشعر
- ارتفاع نسبة السكر في الدم
- ازدياد في الوزن أو السمنة
شنو هما المشاكل الصحية المرتبطة بمتلازمة تكيس المبيض؟
يمكن نذكروا:
- الإصابة بداء السكري
- نمو شعر زائد بشكل غير عادي
- مشاكل في الإنجاب
- في حالة الحمل كايكون خطر الإجهاض كبير جدًا
- الإصابة بأمراض القلب و الشرايين
شنو هي العلاقة بين حبوب منع الحمل و متلازمة تكيس المبيض؟
ليومنا هذا مازال ما كاين حتى شي دراسة تأكد وجود علاقة مباشرة بين حبوب منع الحمل و تكيس المبيض، و لكن بعض النساء بالتجريب كايأكدوا أنه بعد تناول حبوب منع الحمل، كايلاحظوا اختفاء الأعراض.
هنا سيدتي خاصك تعرفي أن حبوب منع الحمل لا تعالج هذه المتلازمة و لكن هي فقط كاتنظم الدورة الشهرية.
شنو هما العلاجات المقترحة ؟
- اتباع نظام غذائي صحي و متوازن كايعاون بشكل كبير في غياب الأعراض
- ممارسة الرياضة كاتساعد في موازنة الهرمونات المضطربة في الجسم
- اتباع نظام غذائي يغيب فيه السكر غادي يعاونك في معادلة نسبة الانسولين في الدم
- في بعض الحالات، ممكن الطبيب ديالك يعطيك بعض الأدوية.
متلازمة تكيس المبيض و حظوظ الحمل عند السيدات
واش السيدة المصابة ممكن تحمل؟ الإجابة هنا هي نعم! حسب ديديي دويلي أستاذ باحث في علم الغدد و الهرمونات في جامعة الطب بمدينة ليل، النساء المصابين عندهم أمل أنهم يولدوا. الإباضة كاتحدث عندهم بشكل تلقائي أيضًا غير أنها نادرًا ما كاتحدث، إذًا هاد السيدات كايقدرو يحملوا لكن بعد محاولات عدة.
السيدة المصابة ممكن تحمل حتى بدون أي علاج أو متابعة طبية و هادشي عاشوه بزاف ديال السيدات. و إذا مانجحاتش فأنها تحمل بعد محاولات عديدة فخاصها متابعة من طرف طبيب النساء و التوليد أو منطرف طبيب الغدد و الهرمونات أو هما معًا باش يساعدوا السيدة على توازن و استقرار الهرمونات.
الأطباء غالبًا ما كاينصحوا السيدة أولًا باتباع نظام غذائي متوازن و سليم يغيب فيه السكر و الدقيق الأبيض، و ممارسة الرياضة. إذا السيدة بقات كاتعاني و ماتحسناتش الحالة ديالها فهنا الطبيب كايعطيها أدوية، أوشي مرات كايقدوا ينصحوا بحقن محفزات الإباضة لتنشيط المبيضين. و إذا هادشي ماعطا حتى نتيجة فممكن تجربوا التخصيب في المختبر.
الحلول المقترحة من طرف الطبيب كاتكون على حساب حالة كل سيدة، المهم هنا هو تكون متابعة طبية منتظمة و نفهموا جميع أن متلازمة تكيس المبيض لا تعني العقم أبدًا.