حفلات الموسيقى برفقة طفلي
في وقتنا الحالي المهرجانات و الحفلات عرفوا تزايد كبير خاصة في فصل الصيف. مرة مرة كاتجينا الرغبة في الحضور بالرغم من أننا معنا طفل صغير، و لكن واش المهرجانات الموسيقية في المغرب تأخد بعين الإعتبار وجود الأطفال أم لا؟ ضجيج، ازدحام، تعب… و إذا قررنا نمشيوا برفقة طفل صغير، فكرة مزيانة أم العكس؟ Graine de vie جات تجاوبك.
مهرجانات الموسيقى في المغرب
جازابلانكا- مهرجان موازين- طانجاز- مهرجان الموسيقى الصوفية في فاس- مهرجان غناوة… و اللائحة طويلة.
حضوركم لشي حفل أو مهرجان مع الوليدات أمر ممتع جدًا ليهم، خاصة إذا كانوا كبار شوية في السن فغادي تبقى عندهم ذكرى خالدة في الذاكرة ديالهم. و لكن واش غادي يستمتعوا فعلًا بحضور المهرجان؟ لأن منين كانقولوا مهرجان مباشرة كانقصدوا: ضجيج، ازدحام الناس، وقوف لساعات طوال، تعب.. فكيفما كانعرفوا جميع، تنظيم المهرجان يختلف من واحد لآخر، كاين لي ملائم للأطفال وكاين لي لا و كايتطلب منا تفكير و تنظيم مسبق لحظوره. كاين لي ماتنظم خلال النهار في عز الصيف، كاين لي كايبدا حتال الليل و كايسالي في وقت متأخر من الليل… فاحتمال كبير أن المهرجان مايسمحش بوجود الطفل.
نصائح للاستمتاع بحضور حفلات الموسيقى برفقة طفلي
المهرجان قرب الموعد ديالو و قررتوا أخيرًا تحضروا ليه برفقة طفلكم، إليكم بعض النصائح:
قبل الذهاب للمهرجان، خوذوا بعين الإعتبار هاد النقط
- المهرجانات المنظمة خلال النهار أفضل ليكم، لأن الطفل غالبًا كايكون فايق. عكس الليل فين كايقرب وقت النعاس ديالو و ديك الساعة ما كاتعرفوش شنو ممكن يخرج منه: بكاء، صراخ،الرفض لكل شيء و زيد و زيد
- تحضير جميع المعدات لي ممكن يحتاجها: حفاظات، قنينة الحليب، قبعة، كريم واقي من الشمس.. خلاصة التحضير لحضور المهرجان تقريبًا بحال التحضير للسفر خاصك تهز معاك أيحاجة خاصة بالطفل.
- التفكير القبلي في التنقل: إذا كان كبير شوية في السن و قادر على المشي، واش غادي يقدر يتمشى المسافة كاملة؟ إذا كان باقي صغير على المشي و يجب عليكم التنقل بالعربة الخاصة به، واش مسموح إدخالها لداك المكان؟ و إذا كنتي غادي تستعملي الحمّال واش ما غاديش يضايقك في الحركة؟ بزاف ديال الأسئلة لي لازم تطرحوهوم على نفسكم مسبقًا لتفادي أي مشكل.
وصلنا لعين المكان
- الحماية من الضجيج: تماما بحال في الأفراح، صوت الموسيقى كايكون عالي بزاف على القدرات السمعية ديالو. فمن الأفضل بكون عند الطفل سماعات عازلة للصوت تلائم العمر ديالو، وخليوه دائما بعيد على مصادر الصوت لتفادي أي مشكل في صحة الأذنين ديالو مستقبلًا
- الإبتعاد عن الإزدحام: مثلًا المهرجانات لي كاتنظم في الصيف عادة ما كاتكون في الهواء الطلق و كاتسمح لكم بالإستمتاع بالموسيقى من بعيد. اختاروا شي مكان بعيد شوية على مصدر الصوت و جلسوا فيه، و تركيزكم دائمًا يكون مع طفلكم.
- الوقاية من الشمس و الحرارة إذا كان المهرجان منظم خلال النهار
و ديروا دائما فبالكم أنه ماشي ضروري تحضروا للحفل من الأول حتال الأخير، لا بأس إذا استمتعتوا شوية و صافي. النصائح لي قدمناها لكم ليست لإحباطكم بل لتوجيهكم. أنتم أكثر وحدين كاتعرفوا القدرة ديال طفلكم، كاين لي يتأقلم فجميع الأوساط و كاين لي حساس و لا يقبل كل شيء… التجربة هي لي غادي تخليكم تزيدوا تتعرفوا على أطفالكم أكثر، فاستمتعوا معهم.