كيفاش نختار الأنشطة اليدوية المناسبة لطفلي
كاين أوقات لي وليداتنا كايجلسو فيها فالدار و كانبغيو نشغلوهم ببعض الأنشطة اليدوية و لكن ما كانعرفوش كيفاش. سواء كانوا أطفالنا مازال مادخلوش للمدرسة أو عندهم عطلة مدرسية أو في نهاية الأسبوع،كانبغيو نلقاو ليهم أنشطة يدوية ترفيهية و تربوية في نفس الوقت. بذرة الحياة جات تعطيكم بعض النصائح بخصوص هذا الموضوع.
أهمية الأنشطة اليدوية
الأنشطة اليدوية عندها دور كبير في حسن نمو الطفل مهما كان السن ديالو، و الأهمية ديال هاد النوع من الأنشطة لم يعد يناقش. استعمال الأصابع ديالهم في لعبة ما كايساعدهم في تطوير:
- المهارة اليدوية الحركية: و لي هي أهم و أولى من تعلم الكتابة، و يمكن الإستعانة بالصور لي كايقدرو يلصقوها في الأوراق أو تركيب حبات العقيق أو الرسم بأقلام سميكة…
- الإبداع: و لأن خيال الطفل واسع و لا حدود له فلا بأس نعاونوه يوظفو في شيء نافع
- التركيز: كيفما كانعرفو جميع أن الأطفال تركيزهم ضعيف جدًا و خاصنا نساعدوهم في تطويره. النشاط اليدوي هو أفضل وسيلة لذلك، نبداو بحصص قصيرة في الزمن و نبقاو غادين و كانطولوا فيهم حتى الطفل كايولف
النقط لي لازم أخذه بعين الإعتبار باش نختار النشاط المناسب لطفلي
كل طفل و باش كايتميز، كل طفل و سرعة النمو ديالو و كل طفل و الميولات ديالو… إذًا خاصني نختار ليه النشاط الأنسب ليه. إليك سيدتي بعض المعايير لي ممكن تركزي عليها وقت الإختيار:
- السن و المستوى العقلي، لأن كيفما كاتعرفي سيدتي لكل سن نشاط مناسب له و لازم تقتارحي على طفلك الألعاب لي غدي يفهمها و يقدر عليها. واخا يكونو وليداتنا في نفس العمر و لكن ديري في بالك أن كل طفل و التطور الذهني ديالو لي كايختالف بيه على الآخرين.
- الوقت لي عندكم و القدرة ديال الطفل علم التركيز: إذا مثلًا عندك 10 دقائق بغيتي تشغلي فيها الطفل، فمجرد ورقة و أقلام ملونة كافيين باش يقديو الغرض حسن من أنك ديري معه الصباغة لي كتطلب وقت كبير و جهد في التحضير (خاصكي تلبسيه الوزرة باش مايوسخش الملابس دياله، تغلفي الطبلة ببلاستيك، غسل شيتات الصباغة، تحضير الصباغة…). خاصكي أيضا تفكري في مدة إنجاز النشاط لي خاصها تكون قصيرة حيت كلما كان الطفل صغير كلما القدرة على التركيز كاتكون عنده قصيرة.
- الأدوات اللازمة لإنجاز النشاط لأنه ماشي دائمًا كايكون كلشي متوفر في البيت. حاولي تقضي بداكشي لي كاين و تخلقي منو حصة ترفيهية ليه. و لا داعي للتفكير في الأنشطة لي غادي تكلفك جهد مادي كبير.
- الذوق ديال طفلك لي غادي تكتاشفيه مع مرور الوقت. كلما اقتارحتي عليه أنواع متعددة من الأنشطة فغادي تلاحظي لأي نوع يميل أكثر. ما تحاوليش تفرضي عليه شي نشاط هو ماباغيهش لأنه ممكن يتقلب الجو لبكاء و رفض كلي للحصة.